ශ්රී ලංකා ටෙලිකොම් (SLT) හි ඉඩම් කිහිපයක අයිතිය රජය සතු ආයතනය යටතට නිසි පරිදි පැවරී නොතිබීම හේතුවෙන් එහි සම්පූර්ණ වටිනාකම තක්සේරු කිරීමේ ගැටලුවක් මතුව ඇතැයි වාර්තා වේ.
මෙම දේපළවලට ශ්රී ලංකා ටෙලිකොම් ආයතනයේ ආර්ථික වශයෙන් උපාය මාර්ගික ස්ථාන කිහිපයක මෙන්ම වැලිකඩ සහ පුංචි බොරැල්ල ප්රදේශවල ඉඩම් ඇතුළත් බව පැවසේ.
මේ අතර Lyca Mobile හි හිමිකරු මෙන්ම ශ්රී ලංකාවේ ගුවන්විදුලි හා රූපවාහිනී නාලිකා 03 ක හිමිකරු සුබාස්කරන් අල්ලිරාජා මහතා මේ වන විට එක්සත් රාජධානියට ගොස් සිටින ජනාධිපති රනිල් වික්රමසිංහ මහතා හමුවීමට දැඩි උත්සාහයක නිරත වන බව ආරංචි මාර්ග පවසයි.
ඔහු ජනාධිපතිවරයා හමුවීමට උත්සාහ කරන්නේ විකිණීමට තීරණය කර ඇති ශ්රී ලංකා ටෙලිකොම් පීඑල්සී සහ ලංකා හොස්පිට්ල් පීඑල්සී හි රජය සතු කොටස් අත්පත් කර ගැනීම සඳහා අවසන් ගිවිසුමකට එළැඹීමේ අරමුණින්.
කෙසේ වෙතත් මෙම කොටස් හිමිකර ගැනීමට ලයිකා මොබයිල් සමාගමට ප්රමාණවත් මූල්ය වත්කම් නොමැති බව වෙළෙඳපොළ ආරංචි මාර්ග පවසයි.
මෙම සමාගම් දෙකේ කොටස් මිලදී ගැනීමට නම් එංගලන්තයේ හෝ ප්රංශයේ දැනට පවතින වත්කම් විකිණීමට සිදු වුවද බදු පැහැර හැරීම් සහ මුදල් විශුද්ධිකරණය පිළිබඳ චෝදනා හේතුවෙන් මේ වනවිට ඔවුන් නීතිමය නීතිමය බාධාවන්ට මුහුණ පා සිටී.